拣车欧游放血黄心颖榨干马明

2018-02-02 20:09

拍拖超过一年的马国明与黄心颖，早前有指女方打入富二代圈子一心钓金龟，同时继续对马明暧昧若即若离，更因为二人多次在公开场合避忌唔合体、又话好耐冇见而传分讯。不过近月关系突然变亲密，去完荷兰欧游返港，马明约心颖歎法国菜庆生，又出席黄家为心颖搞的生日饭，感情进步神速。

44岁的马明悭足半世一朝丧，欧游已经放咗唔少血，日前本刊记者更直击他去铜锣湾showroom睇Benz，莫非想送架车畀心颖做生日同情人节礼物？近得物质主义的心颖多，马明亦开始改变消费模式，眼见朴实乖仔为女变质，难怪心颖到现在都未能融入马家。

撰文：东方新地

图片：新传媒图片库

延伸阅读：

迫爆直播做运动！Lilian Kan靓相图集

DIY教材激发创意梁咏琪为女铺路入玛利诺

马国明与黄心颖拍拖至今已是公开秘密，但他们从未堂堂正正拖实见人，去年尾直肠直肚的马明话:“除非结婚或分手，否则唔需要交代。”之后二人出席公开活动貌合神离，心颖又被指暗挞富贵新欢，分手之说甚嚣尘上，负面新闻随之而来。未几心颖即发功，在台庆颁奖礼前，高调为争视帝的马明落力拉票，当晚又一反常态，高调合体抢镜，当马明失落视帝，她即时呵番于社交网以一句“I proud of you!”力撑。

心颖所做的一切，似乎是想宣示主权，公告天下与马明未甩拖。女友一心归边，马明当然受落，早于一月齐齐放假飞去荷兰旅行，平时悭悭埋埋的马明甘心为女友大放血，据知情者透露:“马明出名系悭佬，赚钱都畀晒阿妈管，佢唔舍得用钱，不过为咗心颖变咗唔少，女友锺意打扮买潮嘢，马明唔多唔少都要跟吓，早前去荷兰玩，大部分使费都系佢畀，唔通旅行拍拖要女仔夹钱咩?去到欧洲又买吓名牌，真系放血㗎!返到香港又到心颖生日，马明今次真系好阔佬，除咗去黄长兴间餐厅食法国菜，仲同心颖成家去尖沙咀食饭，大大个准女婿喺度，佢亦识做埋单。总之近排马明使咗唔少钱啦！马明妈咪觉得心颖贪玩识食，搞到马明变大花筒，所以印象真系麻麻，马明啲家姐都觉得心颖影响好大对佢落晒闸，马明到依家都唔敢带佢返屋企。”

难怪曾对外表示婚后一定会与家人同住的马明，近日亦改口风要努力赚钱再买楼结婚，又话惊相见好同住难，婆媳纠纷难避免，更何况心颖未被家人接受，马明要与心颖继续走下去，看来迟早要与家人分居。

为迎合心颖改变形象是马明的第一步，上周四(1月25日)下午四时许，马明独自驾车到铜锣湾，在利园商场泊好车后，他走到礼顿道的Benz showroom，向来衣着打扮甚求其的他，这日明显有造型，黑色衬衫加黑外套，发型也不是乱七八糟，不少途人都对这位一线小生眼望望。本刊记者直击马明直入车行的VIP房，疑似为买新车办手续，逗留超过半小时后，他手持一个Benz信封离开，只见车行sales对这位大客仔招呼周到，送到出大门口。这时马明见到本刊记者非常友善笑晒口，问他是否买车送心颖，他连番否认说是来为自己架Benz搞维修，但奇就奇在他的座驾停泊在几条街之外。

心颖甜美过人又识得箍住男人心，做咗寡佬多年嘅马明为她心甘命抵改变自己，对于外界指女友贪慕虚荣的指控，他都唔当系一回事。上月心颖29岁生日，与家人在尖沙咀1881庆祝生日，其父母和三位家姐及二姐夫都在场。生日饭局结束后，心颖一家人由餐厅正门离开，并主动让传媒拍全家福，有指当时心颖向记者说马明不在场，但记者却目睹马明同时间趁机由后门闪走。心颖声东击西被指讲大话，马明出言维护是自己不想惹人误会攞心颖家人来作宣传，挺身为女友多番解画，一力承担责任。

马明处处维护令心颖冧爆，二人由保持距离变愈行愈埋，虽然马家落闸但黄家大门却为马明而开，说到在生日当晚见家长一事，心颖直言只是她的生日饭而非安排见家长，不过人对马明印象非常好。事实上马明早已与黄家上下打成一片，早前有人目睹他陪心颖及其二家姐一家去荔枝角的商场玩雪，其时马明与二家姐的仔女玩得好开心，睇得出他非常锺意小朋友，而他与心颖父亲亦多次见面食饭，未来岳父非常满意马明，觉得可以把女儿付讬终身。由此可见，心颖早已食硬马明，现在只有马明屋企人一关未过。其实心颖系醒目世界女，连守财多年的马明都畀佢氹到，应该冇嘢难到佢。

早前在颁奖礼记者会，心颖突然与马明保持距离，其时又传出心颖暗挞富二代，即传二人分讯。但在1月21日的台庆颁奖上，马明虽然失落视帝，但仍凭《降魔的》内的马季一角获得“最受欢迎男角色”，心颖当晚频频发功，除企起身冧爆主动与马明握手外，致谢辞时众人又指住她，示意叫马明多谢她，心颖攞晒彩。

记：本刊记者马：马国明

记：马明买车呀？系咪送畀心颖做生日礼物呀？马：边度仲有钱呀大佬？我架车本身都系呢个品牌，我嚟做servicing啫！记：之前带心颖去黄长兴间法国餐厅庆祝生日？马：系呀！长兴问合照po唔po得？我哋都冇所谓，我哋都唔当系咩一回事。记：第二晚同佢屋企人庆祝，心颖讲大话㖞？马：佢冇讲大话呀！记：心颖话同屋企人食饭冇你份，事实你在场㖞！马：因为颁奖礼前，唔想攞人哋屋企人做宣传，过咗就是但啦！冇所谓啦！

记：本刊记者黄：黄心颖

记：马明去车行睇车，会唔会买车送畀你？黄：哗！应该就唔会喇！佢可能系去整车，我要换车都会系自己买囉！记：你生日马明同你去食法国菜，咁2月13日佢生日又点庆祝？黄：好难谂，我哋两个都要开工，所以未plan边日同点庆祝，尽量睇吓通告同佢夹唔夹到先囉！记：今年系唔系你哋第一个情人节呀？黄：哈哈！呢样嘢就唔透露喇！其实情人节好少会庆祝，佢生日重要啲，情人节费事同人迫，啲嘢又贵晒，我觉得好无谓，主要都系佢生日为大前提。记：去完荷兰欧游，你哋嘅发展进度都好理想㖞！黄：依家都系一个舒服嘅相处方式啦！系好咗了解多咗，同埋呢排好开心，平平淡淡，生日嗰日冇人跟我哋觉得好舒服，做番平常人，希望以后多啲时间静静哋相处啦！记：有冇见过马明妈咪？黄：见过，但唔系正式好似见家长嗰种见。记：伯母有冇催婚？黄：完全冇㖞！我屋企都冇！因为我仲有几个家姐未嫁，呢啲顺其自然啦！依家讲得太远喇！记：马明有番咁上下年纪系时候。黄：其实男人咩岁数都Ok！好多男人都好迟先结婚。