促公佈離島醫院後期運營規劃

宋碧琪

2011年，特區政府制訂《完善醫療系統建設方案》十年規劃，計劃興建包括離島醫院在內的18個公共醫療設施。其中，規模最大、耗資最多的離島醫院，至今完工無期，預算無度，公帑使咗20億，加上未來裝修、儀器、設備等等費用，社會一路擔心，不計成本投入落去，會否透支本澳醫療未來。當然，除了前期建設費用，後期運營成本，尤其緊要，更加唔能唔計。有關部門曾表示，未來離島醫院的規模，相當於目前的山頂醫院，等於再增多一間醫院。今年行政長官答問時，長官亦表示，離島醫療完成後，醫療成本預算將由現時的70億增加一倍。即係話，未來整個澳門的公共醫療開支將達到140億。每年140億元的天價醫療支出，如果得以科學有效利用，實實在在用在市民身上，咁都算值得。不過社會就擔心，如果一旦步氹仔碼頭後塵，設施落成後，使用率不達標，資源錯配或者閒置，對於本澳公帑的使用，分分鐘只會變成一個定時炸彈。事實上，從披露的公開訊息看，除了建設進度，離島醫院落成之後的詳細規劃，見不到任何進展。未來如何與現有醫療系統對接，階段性服務計劃怎樣，醫療效率如何提高，醫護人手如何按時到位，如何避免設施設備閒置，服務病患會實現多少目標，一攬子核心問題，唔清唔楚，以致社會一頭霧水。離島醫院，關乎全澳市民福祉的大型民生項目，並非話為建而建，更加唔能夠話等外殼工程建好後，才想起來以後的運作模式和效益評估。縱觀國際或國內經驗，大型醫院建設，是否要建、建幾大、具體標準、後期運營模式、經濟社會效益，事前都需要一個完整系統的可行性研究分析。檢索網絡公開資料，目前除了一份簡單羅列的《醫療設施興建之階段性進度報告》外，其他有關離島醫院的詳細評估性資料嚴重缺失，少之又少。如果已經有做，應當及時公開，若沒有的話，亦要快馬加鞭，亡羊補牢。否則，莫說一般市民，就算專業人員，對於咁樣一個分分鐘可能變成大白象的超級醫院工程，恐怕都係一知半解，光輝五年又談何有信心呢？endprint