王嫂走亲

◎郑慧冰

王嫂走亲

◎郑慧冰

人物：王嫂（嫂）

李小美（美）

甲女（甲）

乙女（乙）

丙女（丙）

（某日早上，烂塘村王嫂手提一篮鸡蛋上场）

嫂：哎！真当气煞人啦，我家有个表姑娘，嫁到隔壁幸福村，格两日一毛毛个打电话来，说是蹲进了新房子，要我到伢屋里去嬉嬉。呵唷，有所嬉头，格种城中村改造个安置房，我看也勿用看，想想就有数哉，一间间个，像鸡笼，有啥做头！乃末伢个表姑娘真当呆煞，原先家里个房子同我差勿多，有三楼三底，面积毛三百个平方，蹲蹲多少个舒敞来，乃实个不伢拆拆掉。所以我今朝准备去趟来，起杀杀克克个骂伊一顿，有介呆！呵唷，不知不觉鲁迅中学门口到大哉，伢新房子说是在鲁迅中学南面过红绿灯100米就到，名字叫“幸福公寓”（撇撇嘴，边走边说，抬头），闹，“幸福公寓”来大哉！呵，两只大狮子管门口介气派大，右手转围1幢1单元101室，寻着大哉。闹！格个死坯，楼梯门关佬大，叫我乃个进得起，扭办法，我用我个“高音喇叭”算哉，小美，小——美。（幕后）哎——！

嫂：（贴门张望）开门，开门，我到哉！（幕后）门“蹦”一声，自动门弹开。

嫂：（吓一跳）真当科学大，格个可能就是伢来动话个“电子对讲自动门”，外人、贼骨头是走勿进个。（上楼敲门）“呯砰砰”小美，开开门，门开开！（里面正在做着面膜的李小美急忙出来开门）

嫂：哦！鬼，鬼，有鬼！（吓倒在地）

美：（急撕开面膜忙招呼）王嫂是我，王嫂是我，是——我。

嫂：呵，我道青天大白日碰到“鬼”大哉！

美：鬼，哈哈，会有啥个鬼，我格是“做面膜”，来来来，请请请！呵，介客气，鸡蛋驮拉来。

嫂：鸡蛋是我自生个。

美：啊，侬自生个。

嫂：噢，是我自养个鸡生个，

嫂、美：哈，哈，哈。

美：来，先坐先坐。

嫂：勿客气，勿客气，我还是先参观一下侬个新房子。（走向阳台打开窗户）呵，小美，窗门外望望绿花介多，间距介大，环境介好大。话话是一楼，阳光蛮充足，晒东晒西一些勿遮佬个。

美：勿遮佬个，伢个安置房是民心工程，精品工程动来。王嫂，听说乃现在拆迁个话，条件还要好来，都是造小高层哉个！

嫂：啥西，小高层，我勿要，我勿要，我有恐高症个，再话我320斤重个大块头，爬楼梯勿要吃力杀个。

美：呵唷，王嫂，小高层有电梯个，闹，“得儿”个上去，“得儿”个落来，楼梯勿用爬个，像坐飞机一样，多少个下意来！

嫂：嘿嘿，是真当嘛，扎我前半世飞机是扭坐过，后半世听侬话大来，有电梯好乘，要不我想福大来。

美：是个，哈哈，扎侬以后天天好比坐飞机来！

嫂：嗯，好倒是好，但我要考虑考虑再话来！（继续看房）

嫂：呵，小美，侬卫生间里乃个介清爽，浴缸、抽水马桶介白，看起来触眼睛大。

美：话啥西，过去伢农村里，男人登毛坑，女人坐马桶。一个嗯嗯臭，一个臭风风，多少个难闻，多少个要勿来。

嫂：真话倒是真话，现在抽水马桶既卫生又方便。

嫂：闹，小美，侬个灶头间怕佬饭勿烧个，有介清爽，一只苍蝇都没有。

美：苍蝇？怕佬还会有来，伢社区里经常来检查，啥个灭蝇、灭蚊、灭蟑格药长期发佬个。

嫂：社区里，社区里服务真当有介好？

美：格有啥造话好讲，伢社区里服务多少个好，管理多少个规范来。所以，王嫂，城中村改造真当是伢老百姓个福音啦！

嫂：好哉，好哉，啥个福音？我想想真当扭背头，我屋里有三楼三底独立别墅，旁边还有一排平房、矮脚房，里面鸡养养，鸭养养，蛋生生，小日子多少个“知迷”来！

美：好哉好哉，侬格种“饿杀别墅”，热天屋里头苍蝇像“岩鹅”，蚊虫像老鸭。落起雨来，呵唷唷，村堂里都是“烂汪塘”，所以乃村会叫 “烂塘村”。再话养鸡养鸭，多少个脏来，假如禽流感来哉个话，人都要吓杀个，侬不我省省好哉。

嫂（撇撇嘴）：哼哼，话大来。

美：再话我个3套新房子，我盘算得多少个好来，100平方我自己蹲；120平方给儿子做婚房；还有80平方买掉钞票存银行。哈哈哈，后半生，我银行有存款，养老有保险，生活有保障，日子多少个幸福来（说完，猛一推王嫂）。

嫂：哎呀呀！你弄痛我了。

美：呵，勿好意思，王嫂，侬颈椎格老毛病怕佬还勿好动来，我倒是有好长时间勿发哉。

嫂：那侬有啥个神丹妙药。

美：神丹妙药么是麻将勿搓多锻炼。侬勿晓得，伢社区里业余生活有多少个丰富来，有讲座、腰鼓、唱歌、戏曲、排舞……（突然记起看手表）啊，勿对，辰光到大哉，我和姐妹们要到社区活动中心里跳排舞起哉。要不，王嫂，你与我一道跳排舞起。

嫂：我勿会跳个，勿会跳个。

美：勿要紧，伢会教侬个，走走走（拖着王嫂走一圈，朝幕后喊）伟英，小红，阿芳——（甲乙丙三女同上）

甲：小美，侬乃个有介迟，呵，原来是 “烂塘村”个喇叭王嫂来大。

乙：王嫂，侬乃个越来越胖哉。

嫂：是话佬，我也勿晓得。可能事体不做，麻将搓搓，包红心打打，人坐胖哉啦！

乙：介胖，要生“三高”个。

丙：呵呵，侬格种生活方式伢老早BY BY哉。王嫂，听说乃“烂塘”村也要拆迁哉，扎侬也要做新居民哉，我看侬还是趁早加入伢格队伍。

美：呵哟，到目前为止，伊还思想勿通，房子不肯拆动来。

甲乙丙（合）：是真当！

甲：王嫂，城中村改造是政府为伢老百姓办个大实事呀，扎侬真当呆煞动哉！

嫂：（有点难为情）乃真当勿晓得，我屋里头有三楼三底，多少个勿割所来呵。

乙：哎唷唷，产权面积是“拆一还一”个，再加上新房子增值，侬算算帐看，有多少个好背来。

丙：舍小家，为大家，过去侬“喇叭王嫂”为人直爽有名个，凡事都带头，今朝乃个变得介锈扭起来哉。

甲：生活环境美，生活质量高，格才是伢现代人所追求个。

美：耳听为虚，眼见为实，姐妹们，伢还是带伊一起去小区里参观参观。

甲乙丙（合）：好个，好个！

甲（快板音乐起，绕一圈）：侬来看，小区路面光溜溜，公交直达家门口。

乙：再来看，银行就在伢身边，超市进出多方便。

丙：还有那，文化中心社区建，学校、幼儿园一起连。

甲乙（合）：花草遍地，

丙美（合）：绿树成荫，

甲乙丙美（合）：侬话像勿像公园，像勿像公园？

嫂：像个，像个！扎今朝我真当好比是刘姥姥进大观园哉！

美：我看侬呵，真当是刘姥姥，扎到现在侬有有打算动来！

嫂：打算？（坚定地）有！打算回去接受城中村改造，积极主动要求拆迁，并且还要发挥我这个“高音喇叭”个功能，把我在幸福村看到个新事物、新气象统统告诉不伢烂塘村个乡亲们，向她们宣传改造后个新家园有介好（竖大拇指）！

甲乙丙美（合）：嗨！格才是伢心目中个“喇叭王嫂”。美：姐妹们，格末伢唱起来跳起来！

《最炫民族风》音乐起——跳排舞（王嫂学跳）——造型（王嫂中间作可爱状），结束。

（作者系浙江绍兴市越城区城南街道综合文化站站长）

（责任编辑 刘冬杨）